احتراف فنون الرد

كثير مننا بيتعرض لمواقف محرجة لما بيدخل مناقشة مع ناس بتتلذذ بفرد عضلاتها في الكلام. زي إنه يعظّم من نفسه أو يقلل منك. وقتها بتتمنى يكون عندك موهبه الردود السريعة. في ناس بتتمتع فعغلا بالموهبة دي وناس تانية بتتعلمها.

تعال أقول لك في 6 خطوات ازاي تحمي نفسك من الناس دي.

6 حيل للرد على المتنمرين

١) ارمي الكرة في ملعب الخصم:

لو في وسط الكلام لقيت اللي قدامك بيسألك أسئلة تنتهك خصوصيتك، زي " أنت بتقبض كام " أو السؤال السمج بتاع " مش هنفرح بك " على طول رد عليه بسؤال زي... " لما نفرح بك الأول " أو" لما نفرح بولادك الأول "

٢) أظهر دهشتك من كلامه:

أنت اكيد هتكون مستغرب جوه نفسك من جراءته. طيب ليه تخبي دهشتك دي؟! علشان خايف على مشاعره مثلاً ؟ هو نفسه محترمش مشاعرك، ولو كنت حتى بتتكسف، فعادي جداً إنك تظهر له اندهاشك من كلامه وكاغنه غلط غلطة كبيرة.

٣) احترم خصوصيتك الأول:

لازم انت اصلا تكون بتحترم خصوصيتك علشان تقدر تقنع اللي قدامك بكده يعني ما ينفعش تتكلم في اسرار حياتك مع أي حد ولما اللي قدامك يتدخل في شؤونك الخاصة ألفت نظره أن الموضوع شخصي وأنك مش بتحب حد يتدخل في شؤونك الخاصة .

 ٤) دوّر على رد بديل:

لو اللي بيكلمك حد مهم بالنسبة لك؛ زي صديق أو قريب وخايف على مشاعره، فممكن ترد عليه بذوق رد بديل يفهم منه بذكائه إن سؤاله كان في تجاوز بالنسبه لك. زي مثلاً... لو سألك " هنفرح أمتى بك " رد وقتها عليه وقوله إفرح بيا من دلوقتي، أنا الحمد لله نجحت في الكلية.

٥) حاول تتجاهل:

ممكن تتجاهل كلام وكأنك مش سامع، ولو أصر على السؤال. إظهر له إنك بتفكر في الإجابة، بس من غير رد، ده هيخليه يشعر بالإحراج، غاو لو كنت هتغادر وهو استوقفك، ممكن وقتها تبتسم وتسلم عليه وتمشي على طول.

٦) أعمل مش فاهم:

لو وجهلك الشخص ده سؤال كان بايخ، زي إنه بيسالك عن رأيك في حد معين هو عارف إنك مش بتحبه. رد عليه ردود غير منطقية، وخلّيه يرتبك، زي إنك تُبدي إعجابك بمظهره النهاردة - بتكلم عن الشخصية المتنمرة - أو إنك تجاوب بلا مبالاة تقول له مثلاً... فلان ده إنسان عادي يعني، زي بقيت البشر.

طبعاً طول ما احنا عايشين، هنقابل كثير متنمرين ومتطفلين في حياتنا، وعشان نحمي نفسنا منهم لازم نتعلم احتراف فنون الرد إزاي نعمل ده أتمنى أكون قدرت أفيدك.