يوم الإمتحان يكرم المرء أو يُهان.
دي الكلمة اللي بتعشش في دماغنا وقت الإمتحانات. أبني اللعبي الخوف هيبني له زنزانة ويحبسني معاه فيها.
دخل وقت الإمتحانات وأبني أو بنتي مش مذاكرين كويس كالمعتاد وأنا تحت ضغط ومش عارفة اتصرف إزاي.... البيت والولاد وظروف الحياة وضغوطاتها المادية والاجتماعية وكمان دخلت الإمتحانات. أنا كدة عقلي هيطير
أعمل إيه..؟!
دي حيرة كل الأمهات... أنتي مش لوحدك على فكرة. متخافيش كتير معاكي في نفس الدايرة وأنا جاية أقدملك أفضل الحلول علشان تعدي الأزمة دي بخير وسلام، وبأقل الخساير في خطوات سهلة وبسيطة تقدري تطبيقها بنفسك ومع طفلك وتقدري تحسي كمان إنك مسيطرة على الوضع وده هيرجعلك ثقتك بنفسك ويساعدك جداً في إدارة الأزمة دي.
ركزي معايا بقى في اللي جاي... الوقاية خير من العلاج
أولاً كده : أفضل حل للمشكلة إنها متحصلش أصلاً، وطبعاً عشان تحققي ده لازم يكون في ترتيب وتخطيط صح مُسبق لإدارة الوقت بين البيت والأولاد وأحتياجتهم.
طيب حصلت المشكلة خلاص وأتزنقت أعمل إيه؟!.
شوفي بقى... هتعملي كام نقطة كدة علشان تقدري تستعيدي سيطرتك على الأمور من تاني وأنا جمعتهملك بشكل مُرتب علشان يبقى الأمر سهل عليكي.
أهم النقاط الواجب تنفيذها في أزمة الإمتحانات: ١) لازم تفكري بهدوء في المشكلة وتعرفي أبعادها وأسبابها أنتي وطفلك:
ماينفعش وقت الإمتحانات نعاتب ونزعل ونفكر في لعب طول السنة، كل ده مالوش لازمة دلوقت خلاص. أهم حاجة حالياً نتعامل مع الأمر الواقع بهدوء وحكمة علشان نتدارك المشكلة ونقدر نخطط لتجاوزها بسهولة.
٢) تتفاهمي مع طفلك أنه مسؤل عن المشكلة دي وتوضحيله مسؤوليته تجاه نفسه ومستقبله:
كمان لازم يكون في لغة حوار بينك وبين طفلك وطبعاً بنفس الهدوء والحكمة علشان لازم قبل الإتفاق على أي خطة لتدارك الأزمة يكون في إتفاق بينك وبينه إن ده مستقبله اللي لازم يهتم له ويخاف عليه، لازم يحس بالمسؤولية تجاه نفسه ودراسته ومستقبله.
٣) حطي خطة زمنية مع طفلك والتزموا بيها في مراجعة المواد:
بعد تبادل الحوار الحكيم بينكم أكيد هيكون نتاج ده التفاهم بينكم. وقتها بس تقدروا تتفقوا مع بعض حسب الوقت المناسب لكم وتضعوا خطة زمنية -زي جدول كدة- وتلتزموا به أنتم الأتنين.
٤) أعرفي عن منهج طفلك علشان تقدري تقدمي له مساعدتك:
طبعاً هتحاولي تلخصي له المادة على أد ماتقدري وتقدمي له المفيد وتطبقوا عليه سوا -ده في حالة كان صغير ولسه مش متعود على الإمتحانات- أهم حاجة بينكم هي لغة الحوار، خلي طفلك دايمًا متطمن معاكي إنه يقدر يقول رأيه بدون خوف. ده هيوفر عليكي كتير في الوقت اللي ممكن يضيع منكم في موقف صعب زي ده بسبب خوفه مثلاً من رد فعلك لو قال لك إنه مش فاهم كويس من شرحك. لو أتطمن لك ده هيكون دعم كبير له، هيكلمك بصدق وبدون خوف وكمان هيكون الفهم والحفظ سهلين عليه.
٥) لو عندك أطفال صغيرين غيره:
ممكن تشّغيلي وقتهم في لعبة بيحبوها أو أستغلي وقت مشاهدتهم لأفلام الرسوم المتحركة أو نومهم علشان تخصصيه لطفلك الكبير. كده هيكون أفضل لكم انتوا الأتنين، هيوفرلكم هدوء وتركيز أنتم في حاجة ليها.
٦) التدارس الجماعي في البيت:
ممكن كمان لو في حد من قرايبكم في سن أبنك تخليه يذاكر معاه، الأطفال بيشجعوا بعض وبيكونوا متفاعلين أكتر مع بعض، ده غير إنه بالطريقة دي بيذاكر برضا وبيكون مبسوط، وده هينعكس على درجة تحصيلة للمادة. بس المهم يكون تحت إشراف حد من الآباء. الأطفال طبيعتهم بينسوا وبيحبوا اللعب، فلازم يكونوا تحت عنيك باستمرار.
٧) دروس التقوية والمراجعات النهائية:
ممكن تخصصي له مبلغ من ميزانية البيت وقت الإمتحانات لمراجعة الدروس لو محتاج مساعدة مش هتقدري توفريها له إنتي. وفي مجموعات تقوية مدرسية بتقدم ده بسعر بسيط، أو ممكن يحضر مراجعة نهائية مع مدرس هو بيحبه وبيفهم منه وياريت يكون ده في البيت، الأطفال مسؤولية وسلامتهم بالنسبة لنا بالدنيا طبعاً.
٨) قنوات اليوتيوب والدروس المجانية:
ممكن لو مش مناسب ليكي النقطة اللي فاتت تعملي search على يوتيوب هتلاقي مدرسين كتير عاملين قنوات لشرح الدروس وكمان بيعملوا مراجعات. ودي هتكون أوفرلك طبعاً علشان هتكون بشكل مجاني بالكامل، بس برضو لازم تكوني معاه وتتأكدي إنه بيذاكر ومركز ومسرحش مع إعلان من إعلانات اليوتيوب الكتير.
٩) تطبيقات الدراسة على جوجل بلاي:
كمان هتلاقي تطبيقات كتير دلوقتي بتقدم خدمات مجانية أو بأسعار رمزية مقابل الدراسة والمراجعة طول السنة. ودي بتكون أفضل بكتير حتى من مجموعات التقوية، لانها مثلاً بتكون في البيت ومش بتبقى قلقانة عليه أو عليها وكمان بيبقى قدام عنيكي وبتشوفي بنفسك مدى تفاعله مع المجموعة الدراسية والمدرسين.
١٠) القنوات الدراسية المصرية التلفزيونية:
لو مش مناسب لك النقطتين اللي فاتوا، ممكن تشوفي قنوات تعليمية في التلفزيون وتتابعوها سوا وتفهمي النقط الصعبة عليكي وتوضحيهاله. وهنا أحب أقولك إن وزارة التربية والتعليم موفرة قنوات تلفزيونية هايلة والمدرسين فيها بيقدموا المنهج بطريقة رائعة وتفاعلية.
١١) ساعدي طفلك بطريقة ذكية:
دي بقى نقطة مهمة جداً وهيحبها طفلك. لازم يأخد إستراحة من وقت للتاني علشان يقدر تكون حصيلته الذهنية كويسة، عقلنا بيشتغل أفضل بالطريقة دي وبيقدر يحفظ ويسترجع المعلومات بدقة أعلى.
أنتي طبعاً مش هيعجبك النقطة دي وهتقوليلي طول السنة مقضيها لعب وخليه يذاكر بقى شوية.
أنا متفهمة ده وعارفة إحساسك بس حقيقي غلط جداً إنه يفضل قاعد بالساعات علشان يحفظ ويذاكر بس.... بدون فواصل، مش هيبقى عنده قدرة على التركيز ده غير حالة الملل اللي هتصيبه.
زي ما لعبه طول السنة كان غلطة، مذاكرته بالضغط والكمية دي برضو غلطة، لازم نوازن الأمور علشان نتجاوز الفترة دي بدون ضغوطات ومشاكل زيادة، وده على فكرة هيقوى علاقتك بأبنك وهيزود ثقته بيكي.
وخلينا متفقين إن أهم حاجة عايزينها... إننا نعدي الفترة دي بأفضل طريقة للجميع وبدون ضغط نفسي أو توتر.
لو حابة تعرفي أكتر عن فنون إدارة الأزمات والأوقات الصعبة اللي بتواجهيها، وكمان عايزة تعرفي اكتر عن علاقتك بأطفالك والطرق الأنسب لتربيتهم تربية صحية وسليمة ممكن تشوفي مقالات أكتر في قسم عالم المرأة